Amosando publicacións coa etiqueta Toc-Toca Tecnoloxía. Amosar todas as publicacións
Amosando publicacións coa etiqueta Toc-Toca Tecnoloxía. Amosar todas as publicacións

16 de xuño de 2016

Motor solar levitante

Emma e Xaime

Nesta maqueta buscamos un deseño de máquina rotativa que funcione exclusivamente con enerxía dispoñible no espazo (solar). Debido á baixa densidade desta enerxía, débese optimizar o rendemento e reducir ao máximo os rozamentos. Por este motivo, faise un deseño no que o rotor non apoia sobre rodamentos senón que levita coa axuda de seis imáns permanentes.

A enerxía que fai rodar o motor procede de catro células fotovoltaicas que se conectan ao bobinado do rotor. A partir deste feito, o funcionamento do motor imita ao de calquera motor eléctrico clásico, no que a enerxía eléctrica se leva a un devanado indutor que xera un campo magnético que interactúa á súa vez co campo magnético do estátor e produce un par de forzas que leva á rotación.

Temos a presentación:


Tamén o vídeo:
 

2 de maio de 2015

Toc - toca: 2015 Ano Internacional da Luz

A Asemblea Xeral das Nacións Unidas declarou 2015 como o Ano Internacional da Luz e das tecnoloxías baseadas na luz. Non é casualidade que se escollese precisamente este ano. E a razón non é outra máis que a conmemoración de diversos aniversarios: os traballos no campo da óptica realizados en 1015 por Ibn Al-Haytham, a  natureza ondulatoria da luz proposta por Fresnel en 1815, o 150 aniversario da síntese electromagnética de Maxwell, o centenario da teoría xeral da relatividade de Einstein e as achegas de Charles Khao en 1965 sobre o emprego da fibra óptica nas comunicacións. 
Estanse a realizar actividades de divulgación en todo o mundo, e en Galicia en particular, coa finalidade de achegar á sociedade a importancia da luz a as súas tecnoloxías na vida diaria e fomentar vocacións científicas.
No noso instituto quixemos contribuír tamén cunha actividade conxunta a cargo dos departamentos científico tecnolóxicos dentro da liña Toc Toc a Ciencia. Velaquí tedes unhas fotos do traballo realizado.

No centro o trío:


[Notaredes que Don Albert ten un cadro a maiores. Tratase da reprodución da obra de Míra Szabotin, alumna do ELTE Apáczai Csere János Gyakorlógimnazium de Budapest, que nola envía a través do seu profesor, István Basa].

Á dereita, gañadores e finalistas do noso concurso de fotos científicas e textos e, virando un pouco máis, as mellores imaxes do Hubble, segundo The Guardian, cos textos de   traducidos do inglés pola nosa xente de 2º de BAC B, cos carteis explicativos do funcionamento dun telescopio.





[O telescopio, aí do medio, non é o Hubble: é o noso... e querémoslle]
Á esquerda atopamos uns carteis co fundamento teórico dun láser, un resumo dalgunhas das súas aplicacións prácticas e un proxecto, realizado polo alumnado de 4ºA na aula de tecnoloxía, que consiste na transmisión de son na luz do láser.
Á dereita, un estudo comparativo dos distintos tipos de lámpadas do mercado en canto a consumo enerxético e luminosidade ofrecida. Podedes comprobalo vós mesmos prendendo o interruptor.




[Un dos nosos alumnos consultando por que teñen esas cores tan vistosas os fogos de artificio e como se pode medir a velocidade dunha onda electromagnética. Isto tentámolo na clase de física de 2º de bacharelato e... saiu á segunda ou á teceira, iso si, deixamos un cheiro a regalicia queimada para os que viñeron despois.]

Un chisco máis alá, no recanto, os microscopios ópticos, os carteis que explican o seu funcionamento, varias mostras para observar con eles e un modelo anatómico do ollo humano, co seu correspondente cartel para recordar o mecanismo da visión e a percepción das cores.




De momento non hai máis aínda que o ano é longo e se cadra, antes de que remate, argallamos outra cousa. 

Engadimos (8-5-2015), o custionario-guía elaborado polo alumnado de PDC:


13 de xuño de 2014

Toc - toca: xincana biográfica

Estes días, e ata final de curso, temos espallados polo insituto pequenos carteis con biografías de científicos e científicas de todos os campos, dende Química, Bioquímica e Matemáticas ata Tecnoloxía, Física ou Informática. O material foi elaborado por membros dos departamentos científico-tecnolóxicos e o resultado podédelo consultar nesta presentación:


Xincana_fichas_biograficas from marelatarabela


Acompañamos a exposición, como ven sendo habitual, dunha mostra bibliográfica con fondos da nosa biblioteca e da colección Los 40 imprescinbles de la ciencia,  que imprimimos en tamaño A3 para ser lida no noso xa famoso "superatril".  











11 de xuño de 2014

Toc - toca: electromagnetismo


Fig 1: O lapis máxico
Xavier Enjamio e os seus alumnos de PDC, traballaron durante o segundo trimestre nunha serie de proxectos relacionados co electromagnetismo.

Quixeron compartir connosco, no recuncho do Toc Toc, todos os traballos realizados.

Velaquí tedes unhas fotografías e mais unha presentación cunhas breves explicacións. 





Fig. 2 e 3: Electroimán e Motor mendocino

Fig 4: Canón Gauss


13 de xuño de 2013

Sistemas pneumáticos


Quedábanos a penúltima do curso. Foi unha interesante exposición para sabermos, entre outras cousas, que estamos rodeados de sistemas pneumáticos.

 
Entendemos os principios da pneumática e puidemos experimentar no "gran chintófano azul" que nos puxo Xabier:
 


 
 

26 de febreiro de 2013

Toc-toca: Sistemas electrónicos con sensores

Pois non houbo grandes queixas, máis ben todo o contrario: a xente atopoulle chiste a iso de "producir un sinal de saída capaz de provocar un efecto no contorno".

Sensores de temperatura, luz, posición, ruído, humidade, presión, contacto... producían o sinal.

Como digo, todo ben, agás cando o sinal era o sonoro, é dicir, un zunido que semellaba furar nos tímpanos de quen pasaba e facía as delicias dalgún animaliño que ata entón non lle atopara o seu aquel á electrónica.





Polo demais, vaian os nosos parabéns a Xabier. Aquel  taboleiro cheo de cables e chismes, coa súas primitivas mans de Frankenstein, foi moi admirado polos do bacharelato artístico. Vaia artistada! Por fin entenderon o da "arte povera"...

Tamén é certo que isto é Toc-toc A Ciencia e que, na que vai, pouca máis ciencia restará que a "scienza povera"