Sofía Haselgruber, máxima nota no MIR-2022

A noticia é esa, e así a recollen a revista Redacción Médica (cunha entrevista) e La Voz de Galicia. A lembranza e o orgullo chegan pois da man.

Sofía chegou ao IES Aller Ulloa no 2009, dentro dunha promoción da que algúns só temos recordos imborrables. Algún que outro xa pasou por estas páxinas e seguro que todos deberían estar, por varias e boas razóns. E aquí están... 

A foto de Sofía collémola de La Voz, pero a foto de Sofía da xente coa que compartiiu os seus anos no instituto vén directamente da memoria. 12 anos tería(n), 12 anos pasaron. O sorriso fíxose máis grande, e iso emociona. 

O éxito pola intelixencia posta ao servizo do esforzo é unha aprendizaxe de moitos anos. Esta foto de aquí abaixo recolle, quizais, uns comezos; a foto de arriba unha etapa máis cara ao que só agardamos que sexa o mellor do mellor. Parabéns, Sofía.

Sofía, a primeira á esquerda

 

Unha vez máis congratulámonos do bo facer formativo e profesional da nosa xente e neste caso todos os parabéns son para Sofía Haselgruber, nº 1 do MIR 2022.

A seguir a Sofía de 2º do Bacharelato do curso 2014-2015:

 

Copyright IES Aller Ulloa

Campaña de doazón de medula ósea

O alumnado de Cultura Científica (4º da ESO), coordinado pola súa profesora Charo Fernández Blanco, promoveu unha campaña de doazón de medula ósea entre o alumnado do centro. 

A actividade tivo dúas fases:

1. Elaboraración de carteis que mostran en que consiste a leucemia e información de como pode ser combatida grazas ao transplante de medula dun doante compatible. 

2. Nunha segunda fase, foron informando polas aulas para facer chegar á rapazada as condicións para poder ser doador.

Se queredes máis información sobre a doazón de medula ósea podedes acceder á web da Fundación Josep Carreras

Termos esenciais de vacinas e termos relacionados coa pandemia da COVID-19

O Servizo de Normalización Lingüística da USC vén de presentar un vocabulario en liña de rexistros do ámbito dos antíxenos e da inmunización, que complementa o relacionado coa pandemia da COVID-19.

Na web de GCiencia lemos que "Termos esenciais de vacinas é unha listaxe de denominacións integrada por 125 rexistros de bUSCatermos que describen conceptos relacionados co ámbito dos antíxenos, as súas tipoloxías e as campañas de inmunización. O Servizo de Normalización Lingüística da USC acaba de publicar en liña este vocabulario logo de impulsar a fins de 2020 outra lista de rexistros nutrida con case 200 termos relacionados coa pandemia da COVID-19 nas súas vertentes sanitaria e epidemiolóxica".

 

Con B de Ciencia (9) : Un planeta, un desafío

A COVID19 desde o reto sanitario.

Wendy Hao, unha médica de vinte e oito anos, acode voluntaria a Wuhan, para loitar en primeira liña contra a COVID19. Ela, a enfermeira xefe Jane e o doutor Li serán o fío condutor desta BD que, no se empeño por divulgar con corrección científica as múltiples frontes de combate que os profesionais sanitarios teñen que encarar na súa guerra contra a gran pandemia, toma como referencia o Manual de prevención e tratamento da COVID19 seguido pola sanidade chinesa.

O Gen Z Group facilítanos esta obra debuxada por Revolver e traducida ao castelán por Juan Antonio Prieto Velasco. Nas ligazóns de abaixo podes descargar (en PDF) cada un dos capítulos.

Capítulo I

Capítulo II

Capítulo III

Capítulo IV

Capítulo V

Se queres información cualificada sobre a obra, non dubides en acudir a medicinagráfica.com, sitio que consultamos asiduamente e no que atopamos esta BD.

Con B de ciencia (8): Cancro

Con ocasión do encontro coa investigadora Jeanette Rodríguez Val, facémosvos algunha BD-suxestións sobre o tema do cancro.

¡SuperJ al rescate! son cadriños divulgativos de Jesús Sánchez Ruíz, publicados pola Fundación CRIS contra el cáncer. Sinxelos e moi didácticos.

Tamén na rede: Un día como hoy el cáncer de mama entró en casa, grazas á SESPM e Pfizer.

Hai un feixiño de obras que podedes atopar na nosa biblioteca e que se centran no xeito de enfrontaren a enfermidade os doentes e o seu círculo máis próximo.

Encontro con Jeanette Martínez Val

O próximo venres 15, a partir das 8:50, na Biblioteca, celebraremos un encontro coa investigadora e profesora da Facultade de Veterinaria da USC (Campus de Lugo), do grupo de Xenética,  Jannette Martínez Val.

Con B de ciencia (7) : Cara o cruz.

A representación de personalidades, caracteres, vicios e virtudes en forma de animais xa está presente nos primeiros relatos que lembramos. Na BD resúltanos especialmente familiar, desde Donald ata Maus, desde a Pantera Rosa a Blacksad...

Ese é o recurso ao que acode Lou Lubie en Goupil ou face (na tradución pérdese o xogo de palabras) e, como tantas veces, emprégao para dulcificar e mesmo -vaia paradoxo!- humanizar comportamentos ou episodios terribles. Neste caso, o que atopamos é parte da personalidade escindida da protagonista, a "parte escura", transformada nun raposo cunha extrordinaria capacidade de mutación e de sedución. Lou ten que descubrir ese fuxidío raposo (que pouca axuda lle prestan os psico-profesionais!) e, unha vez localizado, iniciar unha longa batalla que, ante a imposibilidade de  sucumbir un dos contendentes sen que o faga o outro, terán que resolver mediante un acordo.

Como facernos entender unha enfermidade mental? Como introducirnos nese mundo tan complexo e abstracto dos transtornos bipolares, ciclotimia e psico-cerellos  varios, sen vanalizar nin crear alarmismos?

Lou Lubie dános as respostas. Conségueo desde o recurso do raposo nunha narración conducida polo ton biográfico-confesional. Nela é quen de crear -a través do humor- unha sutil distancia entre nós e os momentos máis angustiosos e de proporcionarnos, moi ben dosificada, valiosa información científica, tanto a través da trama como dos atractivos esquemas e diagramas que, a xeito de digresións, incrusta na narrativa gráfica.

En definitiva, Cara o cruz: conviviendo con un transtorno mental  logra, con sobresaliente, ese difícil equilibrio entre narración / ficción, por un lado, e información / documentación por outra.

Con B de ciencia (6): Medicina gráfica

Procurando a definición máis simple, poderiamos  dicir que medicina gráfica é o uso da banda deseñada como ferramenta de comunicación sanitaria.

No sitio Medicina gráfica, podemos ampliar a definición, pero o fundamental é que nos fixemos na selección de obras e na información que nos proporciona sobre elas: Tema, puntos fortes, por que é medicina gráfica, ligazóns de interese e unha ficha resumo como esta:

Para profundarmos sobre a medicina gráfica, temos o excelente recurso que, como sempre, nos proporciona a imprescindible Tebeosfera no especial que lle dedica e que foi o punto de partida para esta suxestión.

Consultando un e outro, puidemos comprobar que no noso catálogo temos varias das obras que analizan. Bótalle unha ollada.

Ah! Asociada, ou como unha parte da Medicina gráfica, temos a Patografía gráfica: BD centrada nunha enfermidade narrada por un dos seus protagonistas.

Añadir leyenda

Encontro con Jannette Rodríguez Pallares

O próximo mércores 9, á 1.30, na biblioteca, celebraremos un encontro coa profesora e investigadora do CiMUS (USC), Jannette Rodríguez Pallares.

O tema: Celúlas nai, realidade ou ciencia ficción?

(Benvida, no teu regreso ao instituto, Jannette.) 
A seguir unhas instantáneas da exposición complementar sobre as céluas nai e do encontro con Jannette:

Con B de Ciencia (3) : Sobre células nai.

Ándanos roldando por aí algunha actividade sobre as células nai, ou células estaminais, ou stem cells...
 
Así é que vos propoñemos dúas BD que fan unha excelente introdución sobre o tema. Ambas nolas ofrece gratuitamente a Euro Stem Cell.
 

A primeira, Uma aventura estaminal, ofrécenos unha información esencial en trinta e poucas páxinas. É obra de Joao Ramalho Santos e de André Caetano. Podedes descargar o orixinal, en portugués, ou a tradución ao inglés.

A segunda, A esperanza máis alá das expectativas, máis breve aínda, queda ben definida no seu subtítulo: A historia da celulas nai desde a súa descuberta ata a terapia, pois incide na súa aplicación na medicina, sen ocultar a polémica que pode xerar a súa aplicación. Podémola descargar en portugués ou en varios idiomas máis, pero non en galego nin en castelán.

Tanto unha como outro exemplifican un bo aproveitamento dos recursos da BD para a divulgación científica.

CienciAtiras (16) : Descubrindo Fleming

[Descuberta da penicilina]

de Luís Davila en R.

Encontro con... Angel Carracedo

O pasado martes 20 de Maio, o alumnado de 1ª A de bacharelato acompañado de Natalia, a profesora de Bioloxía, asistiu a unha charla de divulgación científica do doutor Angel Carracedo, no auditorio de Vila de Cruces.

Angel carracedo é catedrático e director do Instituto de Medicina Legal de Santiago de Compostela e da Fundación Galega de Medicina Xenómica, así como vicepresidente da Academia Internacional de Medicina Legal. Ten publicacións en revistas de gran prestixio internacional, como Science ou Nature. 

É destacado investigador no campos da xenética aplicada, xenética de poboacións e medicina forense, disciplina esta última na que é un recoñecido especialista a nivel mundial.