17 de febreiro de 2022

Olímpicos biólogos / biólogos olímpicos: Audaces fortuna iuvat

Denís Iglesias e Adrián Llinares, dirixidos pola profesora Natalia Fernández, son os nosos olímpicos destacados na fase autonómica da Olimpiada Española de Biología. Seleccionados na primeira proba telemática, irán mañá á facultade de Ciencias da UDC, acompañados polo noso Vicedirector Santiago Cerviño, para afrontar a proba definitiva. 

Denís e Adrián


10 de febreiro de 2022

Visita ao Centro de Investigacións Biolóxicas (CIBUS)

 Por Natalia Fernández, Profesora de Bioloxía

O mércores 2 de febreiro, o alumnado STEM de 2º do Bacharelato desprazouse ata os laboratorios de Microbioloxía da Facultade de Bioloxía da USC, para levar a cabo unha práctica con bacteriófagos, os virus que infectan as bacterias.
Tras rematar a actividade, pasearon polo Campus Sur, achegándose ata o Observatorio Astronómico da USC que, ao igual que o noso centro, leva o nome do astrónomo de Lalín,  Ramón Mª Aller Ulloa,
Despois de xantar visitaron o Museo de Historia Natural da USC Luis Iglesias, onde puideron apreciar, entre outras moitas cousas, a magnífica colección de minerais e rochas que alí se expón, así como os modelos cristalográficos de madeira que pertenceron ao matemático de Bermés, Xosé Rodríguez González.





 Ao fío da visita, dous dos alumnos do STEM achegáronnos a seguinte reflexión:

"A actividade resultou moi interesante ao non poder facer uso no laboratorio do noso instituto destas técnicas coas que puidemos observar a actuación de bacteriófagos en disolucións con bacterias. Ao mesmo tempo, puidémonos facer unha idea aproximada do que é a vida na Universidade, e ata accedemos ao interior dos edificios das Facultades de Bioloxía e Medicina"

Marta García e Adrián Llinares, 2º Bac. A





8 de febreiro de 2022

11 F : Día Internacional da Muller e a Nena na Ciencia

 

O 11 de febreiro celébrase o Día Internacional da Muller e a Nena na Ciencia,  e como sempre o noso centro súmase a tal conmemoración con diversas actividades coordinadas polo Departamento de Bioloxía.

Así, alumnado de 2º e 4º da ESO e 1º do Bacharelato puido asistir este martes a unha conferencia online, no marco da Semana da Muller e a Nena na Ciencia que tivo como protagonista á asociación Aseica mujer que nos presentou o programa "Conócelas", permitíndonos deste modo coñecer a dúas investigadoras que nos contaron a súa experiencia no ámbito do traballo e  nos mostraron como é o camiño para chegar a ser unha investigadora hoxe en día, para iso, remontáronse aos seus estudos no IES, ao seu paso pola Universidade, á tese doutoral e aos posteriores traballos xa no ámbito da investigación, achegándonos as súas vivencias neste último aspecto. Así:

Inés Martínez Penas mostrounos como contribúe á investigación contra o cancro desde o Instituto de Investigación Sanitaria de Santiago de Compostela.

Ana Belén Dávila ensinounos como as nanopartículas poden axudar a que os medicamentos actúen só sobre os tumores sen danar as células boas.

Podedes consultar máis información sobre este programa na súa páxina web: https://www.aseica.es/aseica-mujer-lanza-conocelas

Mar Espinosa, profesora de Química.


 A seguir unhas fotos dos relatorios:









10 de decembro de 2021

O señor das moscas

Cando falamos de "O señor das moscas" vénnos a cabeza a figura de William Golding, autor da novela inglesa Lord of the flies, pero este 4 de decembro a Universidade Nacional Autónoma de México, a través da súa conta de Twitter para a divulgación da ciencia, quixo recordarnos que hai outro "señor das moscas": Thomas Hunt Morgan, xenetista estadounidense, Nóbel en Medicina (1933) e que, entre outras cousas, estudou a macromutación na mosca da froita. Aquí vos deixamos a publicación da DGDC UNAM:



3 de novembro de 2021

XII Día da Ciencia en Galego

Unha vez máis conmemoramos o Día da Ciencia en Galego, e con el novembro pasou a ser o Mes da Ciencia en Galego, co obxectivo de normalizar o uso do galego no ámbito da divulgación científica.

E ao fío de tal conmemoración, o Instituto Galega de Ciencia (Igaciencia) propón dedicarlle dito Mes da Ciencia a Alan Turing, e á galega, Tarsy Carballas.

Alan Turing

A elección da edafóloga e científica galega María Tarsy Carballas veu motivada por ser unha pioneira no estudo da xénese, clasificación e cartografía dos solos da zona temperada–húmida de España.

María Tarsy Carballas

A seguir engadimos un enlace para que poidas ler o Manifesto que Ángel Carracedo, catedrático e director do Instituto de Medicina Legal de Santiago e da Fundación Galega de Medicina Xenómica e vicepresidente da Academia Internacional de Medicina Legal elaborou co gallo do Mes da Ciencia en Galego.

Ademais, e aproveitando tal evento non está demais lembrar que o pasado 8 de outubro se celebrou o Día da Ciencia en Galicia, dedicado á figura de Jimena Fernández de la Vega, natural de Vegadeo (Asturias), xenetista e profesora moi recoñecida do século XX. Jimena, xunto coa súa irmá xemelga Elisa, foron as primeiras mulleres licenciadas en Medicina pola USC, representando un referente excepcional do que foi a incorporación da muller, por fin, aos estudos universitarios. [Máis na páxina da RAGC]

 

Jimena Fernández de la Vega